Tai Wo Hong Estate Agent Limited

地產新聞

樓市五節棍之代理高層「騰雞」捽數

(林木地) 2013年4月27日

第一棍：教授話樓市仲跌緊

住宅二手市場訊息混亂，售價有升有跌，不過有教授話，個市仲跌緊，不用太急入市，仲話早前樓盤叫價太高，現在減些少，未算真正減價。
《生果報》稱，曾淵滄續踩樓市，只宜自住，「減價呃人　未跌完」。政府推出新辣招剛滿兩個月，辣死二手樓市，減價潮蔓延，馬鞍山海典居捧蛋兩月後，業主終向現實低頭，減價70萬元，以868萬元沽出三房戶。就市場頻錄減價成交應否入市，大學教授曾淵滄堅持自住無問題，但「如果諗住賺錢，樓市仲跌嘅，你買來做乜嘢呢！」

第二棍：大行轉軚睇樓價跌

順勢而行，一向係投資金科玉律，有外資行見政府不斷出招，個市成交又跌成咁樣，咪順手出個報告睇淡個市。
《香港雙報》講，瑞銀料今年港樓價最多跌10%，未來住宅供應仍短缺。瑞銀昨日發表報告，講及有關香港及內地房地產市場情況及預測，瑞銀預期今年本港整體樓價會下跌5%至10%。而內地全年整體樓價將會出現約5%的波幅，其中一、二線城市樓價或升幅較多，而三、四線城市樓價則相對較弱。

第三棍：高手漏夜趕科場

最近諗住賣樓人多，反而想入市人少了。有傳前高官及商界猛人馬時亨，以買公司入市購入豪宅，出資入市達三千幾萬元，大顯人棄我取之逆向智慧。
《搵銀報》指出，馬時亨3500萬購浪琴園，買殼避DSD。喜愛投資物業的前商務及經濟發展局局長馬時亨或有關人士，早前以「買殼」形式購大潭浪琴園物業，作價逾3,500萬元，成功避免繳交近300萬元雙倍印花稅（DSD）。

第四棍：代理高層「騰雞」捽數

人無千日好，花無百日紅。近年旺到冇朋友的地產市場，突然於呢幾個月沉淪，有代理高層震騰騰，幾乎兩三日便出一個短訊，要員工點點，但呢個月咁靜，加上一手盤真空期，想信業績見紅在所難免。
《太公報》謂，六貨尾盤新例前清倉，利嘉閣再發「捽數」短訊。一手物業銷售新例生效死線進入倒數，新盤鬥劈價清貨潮下，史無前例地一周6盤清袋，包括嘉里（00683）西環西浦1名港客近1.192億元掃3伙為樓盤畫上句號，買家需繳付逾千萬雙倍印花稅。與此同時，新例下周一生效，新盤供應將歷史性陷斷層，大市成交無可避免劇跌，代理面臨重大考驗，利嘉閣向管理層發出「捽數」短訊，不過短訊未有提及不達標者會被開刀。

第五棍：新盤罕見賣樓真空期

一手例今月底實施，條文二百幾頁水蛇春咁長，要消化不易，難怪不少樓神為免身陷囹圄，觸犯刑法，紛紛於呢輪停市，睇住個市怎變化才訂。
《文人報》報導，全港逾66盤停售怕犯例下周一起新盤睇樓活動近冰封。距《一手住宅物業銷售條例》生效進入倒數，港人扶老攜幼到新盤售樓處睇樓作消閒節目現象，可能要暫時「冰封」一段日子。該報統計，全港10個發展商旗下至少66個貨尾盤，因仍待製作合乎一手新例要求的新版樓書和價單，本月29日起（即一手新例生效首天），將暫停開放示範單位，意味港人要過一段「冇樓睇」日子。至於已向運輸及房屋局（運房局）呈交新版樓書的粉嶺逸峯，負責銷售的恒地（0012）昨突然上載新版價單，列出146伙價錢，並於一手新例生效當日發售。